આ ખીલવું, મહોરવું, ખરી પડવું શું ચીજ છે? ને પછી વાયરાની સંગાથે ખખડવું શું ચીજ છે? આ નિર્લેપ આકાશને કોઇ તો સમજાવો આ વાત મળવાનો અર્થ શું અને બીછડવું શું ચીજ છે? ને તે છતાંય કામ એનું કાબિલે તારિફ નીકળ્યું બાકી ટેરવાંને શી ખબર કે રડવું શું ચીજ છે? જ્યાં સુધી એક ટહુકાને પોતાનામાં કેદ ન કર્યો પિંજરને નહોતી ખબર કે ફફડવું શું ચીજ છે? એક રાધાને ભિતર પ્રગટાવી શકો તો જ સમજાશે બાવરી આંખોને મોરપિચ્છનું જડવું શું ચીજ છે? વ્યવહારૂ થઈ જીવ્યા તો નહી જાણી શકો કદી ઝુરવું તે શું અને એકલાં બબડવું શું ચીજ છે?