દુનિયા

દુનિયા તો છે જાદુના ખેલ મનવા ! છે જાદુના ખેલ

ઉપરથી સૌ ઉજળા લાગે, ભીતર ભાત ભાતના મેલ

દેખાય નહી કોઇને એવી એક ચાહત નામે ચીજ

પામે તેને પડતી ગમ્મત બાકીનાને ચડતી ખીજ

ચોતરફ ચહેરાના પહેરાં, છે આ તાળાવિહોણી જેલ

દુનિયા તો છે જાદુના ખેલ મનવા! છે જાદુના ખેલ

પહોંચવુ ક્યાં એ કોઇ ન જાણે ને તોયે સૌ જ્યાં દોડે

અર્ધી જીંદગી બાંધે ગાંઠો ને પછી બેઠાં બેઠાં છોડે,

અંહી ઝંખનાઓના ઝાડે વિંટળાતી ઇચ્છાઓની વેલ

દુનિયા તો છે જાદુના ખેલ મનવા ! છે જાદુના ખેલ

ઉપરથી સૌ ઉજળા લાગે, ભીતર ભાત ભાતના મેલ